രാഷ്ട്രീയ സംവാദങ്ങൾ അസ്തമിക്കുന്നിടത്താണ് സമൂഹം അരക്ഷിതമാകുന്നത്.
കക്ഷിരാഷ്ട്രീയങ്ങൾക്കും മത താല്പര്യങ്ങൾക്കുമതീതമായി രാജ്യ താല്പര്യങ്ങൾക്ക് മുൻഗണന കൊടുക്കുമ്പോഴാണ്ജ നാധിപത്യ സംവിധാനങ്ങൾ കാര്യക്ഷമമാവുകയുള്ളൂവെന്ന് പൊളിറ്റിക്കൽ സയന്റിസ്റ്റും എഴുത്തുകാരനുമായ ജെ പ്രഭാഷ് പറഞ്ഞു.

എസ് എസ് എഫ് സംസ്ഥാന കമ്മിറ്റിയുടെ കീഴിൽ നടക്കുന്ന പൊളിറ്റിക്കൽ സ്കൂളിന്റെ ഭാഗമായി സംഘടിപ്പിക്കപ്പെട്ട ഗാന്ധി പഠന സംഗമം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

നമുക്കിടയിൽ പൊളിറ്റിക്കൽ കമ്മ്യൂണിക്കേഷൻ അസ്തമിക്കുകയും വിളംബരങ്ങൾ മാത്രം കേൾക്കുന്ന തലമുറയായി നമ്മൾ മാറിയിട്ടുണ്ടെന്നും അദ്ദേഹം അഭിപ്രായപ്പെട്ടു. ഇന്ത്യയിലെ ഗ്രാമങ്ങളിൽ ജനങ്ങളെ ചേർത്തുപിടിച്ച് ഗാന്ധിജി നടന്ന വഴികളിൽ ഇനിയുമാളുകൾ വരണം. ജനാധിപത്യത്തിന്റെ ഭാഷ
സഹൃദയത്തിന്റെതാവണമെന്നും അദ്ദേഹം കൂട്ടിച്ചേർത്തു.

കോഴിക്കോട് സ്റ്റുഡൻസ് സെന്ററിൽ വച്ച് നടന്ന പരിപാടിയിൽ വ്യത്യസ്ത ജില്ലകളിൽ നിന്നുള്ള നിരവധി പഠിതാക്കൾ പങ്കെടുത്തു. എസ് എസ് എഫ് സംസ്ഥാന സെക്രട്ടറി ഹാരിസ് വയനാട്, മുഹമ്മദ് സ്വാദിഖ് തെന്നല, അബ്ദുൽ ബാരി ബുഖാരി സംബന്ധിച്ചു.